خمس حلول لما تفقد السيطرة على مجموعة الكتب بتاعتك

اكتشفت أن فيه نوعين من الأمهات موجودين؛ واحدة في مهمة مش بتنتهي لتقليل الفوضى، مش بعيد تنتهي قريبًا بأنها ترمي جوزها كمان وسط باقي الكركبة. والتانية هي اللي بتكتنز كل وأيّ حاجة. أيوة، قصدي عليكي ياللي ماسكة عشر قصاقيص ورق فيها أول شخبطة لبنتك. 

عمري ما اتفاجئت من السرعة اللي بتتضاعف بيها الكراكيب غير لما اتجوزت. وأنا بحضّر حاجتي من بيت طفولتي، الموضوع دا أخد مني شهر. زوّد طفل مع شوية الكراكيب المتضاعفة دي، وبعدين زوّد شوية كتب. ويا سلام على النتيجة النموذجية! 

طبعًا، لو حد اقترح عليكي ترمي كتبك بهدف تقليل الفوضى.. فأنا باقترح عليكي بكل جدية تراجعي أهمية وجود الشخص دا في حياتك. وأنا هقدم لكم دلوقتي حلول مختلفة تناسب نوعين الأمهات اللي ذكرتهم فوق. 

• تدوير الكتب

زي مفهوم تدوير الألعاب وتبديلها كدا، هيكون أحسن لو خلّيت بس شوية كتب معروضة قدام طفلك وتغيّر المجموعة دي بشكل روتيني. دا بيخليهم مشغولين ومستمعين بالعدد اللي قدامهم، وبيريّحك لأن باقي الكتب مش عاملة دوشة بصريّة ولا قدام عينك في كل حتة. 

• اللي بتحب الإكتناز: موافقة 
• مهووسة التنضيف: موافقة

استبدال الكتب 

قابلت مبادرة رائعة بتديرها أمهات مهووسات بالقراءة، فكرتها هي تجمُّع شهري بيجيب فيه كل عضو كتب مش محتاج ليها أو كتب عاوز يستبدلها. الكتب دي تعتبر "رصيد" بيمكنهم من استعارة الكتب التانية اللي بيحضرها باقي الأعضاء.. وهكذا. 

تقدر تتابع الأكونت بتاعهم على إنستجرام لتفاصيل أكتر عن التجمع القادم: 

(@bookswap_newcairo) 

اللي بتحب الإكتناز: موافقة (تقدري تعيري الكتاب) 

مهووسة التنضيف: موافقة (تقدري تتبرعي بالكتاب)

التبرعات 

ضاعف فوايد الكتب بأنك تعلم طفلك من خلالها عن العمل الخيري. ممكن تزور مع طفلك دور رعاية الأطفال وتتبرعوا بالكتب، ممكن تسيبوهم في حضانة تعرفوها، أو تهادي بيهم الأطفال الأصغر في العيلة. 

لاختيار حضانة تستحق، بارشّح بشدة حضانة مصابيح. هي مؤسسة غير حكومية في منطقة الكيلو ٤.٥ وهي منطقة بتفتقر مميزات كتيرة، لكن الحضانة بتقبل كل الأطفال بما فيهم أطفال القدرات الخاصة واللي عندهم صعوبات تعلم. تابع صفحتهم على إنستجرام عشان تعرف أكتر (@massabih_ngo) 

• اللي بتحب الإكتناز: همم، ممكن زيارة أو تبرع مادي.
• مهووسة التنضيف: موافقة

أصدقاء المراسلة.. تاني! 

ممكن نفكّر برا الصندوق (أو ناخد فكرة من جوا الصندوق) ونقترح رجوع نشاط قديم زي صداقة المراسلة! اعملي جروب لعدّة أطفال مهتمين بالقراءة عشان يستبدلوا الكتب والجوابات كل شهر. يقدروا يبعتوا لبعض الكتب ومعاها جواب بيحكي عن الكتاب، فيه نقد للكتاب، أو رسمة لها علاقة بالقصة.. خليهم يبدعوا بأفكارهم!

تحديد الأولويات 

بتيجي لحظات في الحياة، بنحتاج نعيد ترتيب أولوياتنا ونحدد إيه فيهم اللي عندنا قدرة جسدية ونفسية للتعامل معاه. ومش المفروض نحكم على بعض، بالعكس لازم ندعم ونشجع كل شخص أنه يعمل اللي يريَحه. لو قررتي تخزّني الكتب في كل زاوية وركن تلاقيه، ممكن أرشح لك أماكن عادة بتتنسى؛ زيّ الفرن، التلاجة، غسالة الأطباق، الحوض، وتحت ترابيزة السفرة. 

• اللي بتحب الإكتناز: موافقة 
• مهووسة التنضيف: اتصلوا بالنجدة!

مهما كانت الطريقة اللي هتختارها مع كتبك، أهم جزء هو أنك تعاملهم بالإحترام والتقدير اللي يستحقوه. وشاركنا لو عندك أفكار تانية في خانة التعليقات تحت!